یوٹیوب، فیس بک، انسٹاگرام اور وٹس ایپ سمیت کوئی پلیٹ فارم ایسا نہیں جہاں جون ایلیا کی شہرت و مقبولیت کا ڈنکا نہ بج رہا ہو۔ سوشل میڈیا کے دور میں ایسی فالونگ شاید ہی اردو کے کسی دوسرے شاعر کو میسر ہوئی ہو۔
اختر عثمان معاصر اردو شاعری کا معتبر حوالہ اور معروف نقاد ہیں۔ انڈپینڈنٹ اردو سے بات کرتے ہوئے ان کا کہنا تھا کہ ’جون ایلیا سوشل میڈیا کی آمد سے پہلے کراچی کے علمی و ادبی حلقوں میں تو مشہور تھے مگر راولپنڈی، اسلام آباد اور لاہور میں ان کا ذکر کم کم سنائی دیتا تھا۔‘
معروف محقق عقیل عباس جعفری اس سے مختلف نقطہ نظر رکھتے ہیں۔ انڈپینڈنٹ اردو سے بات کرتے ہوئے ان کا کہنا تھا کہ ’جون فنون، نیرنگ خیال، ادب لطیف اور ماہ نو جیسے رسالوں میں چھپ رہے تھے اس لیے اپنی کتاب سے پہلے ہی وہ ایک اچھے شاعر کا تاثر پورے پاکستان میں بنا چکے تھے۔ وہ لاہور اور راولپنڈی کے ادبی قارئین میں ’شاید‘ سے پہلے بھی مشہور ہو چکے تھے۔‘